உணர்வு

சத்தமிட்டு அழுதால் பசி

வீல் என்று அழுதால் ஏதோ கடித்துவிட்டது

சிணுங்கி அழுதால் கவனத்தை ஈர்க்க

இப்படி

மொழி தேவை இல்லாமலே

உனக்கு என் எண்ணம் புரிகிறதே 

எப்படி?

உன்னுள்ளேயே இருந்ததால்

நான் வேண்டுவதை

மொழி தேவையின்றியே உணர்கிறாயோ..... 

அம்மா !!!!

சந்தித்த வேளை

ஞாபகம் வரவில்லை

எவ்வளவு யோசித்தாலும்

உன்னை சந்தித்த வேளை

ஓட்டி பார்க்கிறேன்

என் மனதை

உன்னை நினைக்க தொடங்கிய நாளை

தேடி பார்க்கிறேன்

நீ முழுதாய் என்னை ஆக்கிரமித்த நாளை

ஆனால் கண்டுபிடிக்க முடியவில்லை

எந்த நிமிடம் நிகழ்ந்தது என்று

உன் மீதான ப்ரியம்

அதனால் என்ன

நிகழ்ந்தது எந்த நொடியிலாயினும்

ஒவ்வொரு நொடியும்

நிகழ்ந்து கொண்டே இருக்கிறது

சந்திப்பு 

உன் நினைவுகள் என் மனதினில்...

நீ

கேள்விகள் கேட்கிறேன் நான்

மெளனம் காக்கிறாய் நீ

கோபம் கொள்கிறேன் நான்

புன்னகை பூக்கிறாய் நீ

விளையாட்டாய் சண்டையிடுகிறேன் நான்

ரசித்து சிரிக்கிறாய் நீ

கவலையில் இருக்கிறேன் நான்

ஆறுதலுடன் அணைக்கிறாய் நீ

வேலை செய்ய கூறுகிறேன் நான்

என்னை பார்த்து கொண்டிருப்பதே வேலை என்கிறாய் நீ

இப்படி செய்துக்கொண்டே இருந்தால்

எப்படி உன்னை காதலிப்பதை நிறுத்துவதாம்…...

 

அதற்கும் கூறுகிறாய்

நிறுத்த வேண்டாம்

இன்னும் அதிகமாக காதலி என்று........

வன்முறை

ஊரெங்கும் கேட்கின்றது

மனிதாபிமானத்தின் குரல்

ஓங்குகின்றன

நியாயத்தை தேடி

உரிமையை தேடி

போராட்டங்கள்

நிகழ்கின்றன 

பொது சாலைகளில்

கடற்கரையில்

ரயில் தண்டவாளங்களில்

கண்டனங்கள்

ஆயினும்

எதையும் பொருட்டாக மதியாது

தொடர்கின்றது

மனிதாபிமானத்தை தொலைத்த

ஆனால் மனித உருவில் இருக்கும்

கொடுமையளர்களின்

ஐந்தறிவு உயிர்களிடத்தினும் 
கீழானவர்களின்

ஒழிக்க முடியாத வன்முறை

உலகம் அழியப்போவதில்லை இயற்கையால்

ஆனால்

அழிக்கப்படத்தான் போகிறது

இத்தகைய வன்முறையாளர்களால்......

இலையுதிர் காலம்

ஆரம்பமாகி விட்டது

இலையுதிர் காலம்

சின்ன துளிர்களாக தோன்றி

மரத்தின் ஆதரவில் மகிழ்ச்சியோடு ஒன்றி

அதன் ஊட்டச்சத்தின் ஒரு பங்கை உறிஞ்சிக்கொண்டு

ஒவ்வொரு நாளும் செழித்து வளர்ந்து

கொண்டாடிய காலம் முடிந்தது...

சீராட்டிய மரத்தின் பந்தம்

அறுந்தது 

ஒரு நொடியில்

முதியோர் இல்லத்தில்

விட்டு சென்ற மகனின்

சொந்தத்தை போலவே..........

ஊடலும் கூடலும்

எதோ சிறு விஷயம்

என் தப்பு தான் என்று நீ குற்றம் கூற
உனது தப்பே என்று நான் வாதாட ....

நீ பொறுப்பில்லாதவள் என்று கூற

பொறுமையில்லாதவன் என நான் சாட...

அன்பில்லை உனக்கு என்க

என்னை புரிந்து கொள்ளவில்லை என்று நான் ஏங்க...

ஆரம்பமானது

அழுகையும் கோபமும் நிறைந்த போர்க்களம்

வார்த்தைகள் தடிக்க

விட்டுக்கொடுக்க மறுத்து இருவரும் வளர்க்க

முடிவில் குடிக்கொண்டது மெளனம்

தடித்த வார்த்தைகளை தாங்கிய மனது

தவித்தது உன் மெளனத்தை தாங்காமல்

சற்று பொறுத்து

சந்தித்தது இருவர் பார்வைகளும்

உன்னை மீறி உன் கரங்கள் எழ

என்னை மறந்து நான் சரணடைய

ஊடலின் காரணம் மறக்க.......

ஊடல் கூடலானது

உன் அணைப்பினில்........

என் தோழிகள்

எனக்கு தோழிகள் இருக்கின்றனர்

எப்பொழுதும் சிரிக்கின்ற

நான் திட்டினாலும் வாங்கி கொண்டு அமைதி காக்கின்ற

என் புலம்பல்களை கேள்வி இல்லாமல் கேட்டுக்கொள்கின்ற

நான் அடித்தாலும் வாங்கிகொள்கின்ற

தனிமை தாக்குகையில் அணைத்துக்கொள்கின்ற

என்னை குறை கூறாத

எப்பொழுதும்

என்னோடு விளையாடுகின்ற தோழிகள்

பொறுங்கள்

என்ன

நம்ப முடியவில்லையா...

இருக்க முடியாதா

அப்படி பட்ட தோழிகள்.....

ஏன்?

என் அறையில் வந்து பாருங்கள்

அப்படிப்பட்ட தோழிகளை

காதல் கவிதை

காதல் ஒரு கவிதை தான்

அன்பான பார்வையில்

அழகான பேச்சினில்

வயதையும் உருவத்தையும் கடந்த அன்பினில்

விட்டுக்கொடுக்கும் பண்பினில்

தன்னை மீறிய நேசத்தில்

பரஸ்பர நம்பிக்கையில்....

கவிதையின் அழகு சார்ந்து இருக்கிறது
அதை எழுதும் மனிதனின் வார்த்தைகளில்

காதலின் அழகு சார்ந்து இருக்கிறது
காதல் புரியும் அன்பாளர்களின்
நேர்மையான அன்பினில்....

சிறு வயது ஞாபகம்

தெரியவில்லை

இன்னும் எத்தனை காலங்கள் 

வாழ்வோம் என்று

ஆனால் 

நினைவில் என்றும் தங்குகிறது

பள்ளி நண்பர்களும்

விளையாடிய விளையாட்டுக்களும்

வகுப்பில் புரிந்த குறும்பு செயல்களும்

கட்டுபடுத்திய தூக்கமும்

வாங்கிய திட்டுக்களும்

ஒவ்வொரு தேர்விற்கும் பயந்ததும்

இரவு நேர படிப்பும்

தேர்வு கடைசி நாளின் விடுமுறை எதிர்ப்பார்ப்பும்

பள்ளி திறக்கும் நாளின் காலை புலம்பலும்

கூப்பிட்டு கொண்ட பட்ட பெயர்களும்

ஓவ்வொரு நண்பருக்கும் இருக்கும் விசேஷ சம்பவங்களும்

பிடித்த ஆசிரியர்களும் நாம் திட்டிய ஆசிரியர்களும்

பண்டிகைக்கு பத்து நாள் முந்திய உற்சாகமும்

தீபாவளி புத்தாடையும் பட்டாசு கொண்டாட்டங்களும்...

பள்ளி கலை நிகழ்ச்சிகளும்

கலந்து கொண்ட விளையாட்டு போட்டிகளும்

இப்படி

நாம் அறியாமல் சேர்க்க பட்டுள்ளது

சிறு வயது ஞாபகங்கள்

நம் மனதில் பொக்கிஷமாக.....

எதிர்பார்ப்புகள்

எனக்காக நீ தேடி அலைய வேண்டாம்

அழகான நகைகளுக்கோ

வித விதமான உடைகளுக்கோ

பஞ்சடைத்த பொம்மைகளுக்கோ

வாசனை பொருட்களுக்கோ....

ஏனெனில் என் தேவைகள் அவை அல்ல

என் தேவைகள் மிகவும் சிக்கனமானது

சொல்லவா.........

காலை எழுந்ததும் என்னை நோக்கி ஒரு புன்னகை

ஏதேனும் சிறு தவறு நேர்ந்தால் புரிதலோடு ஒரு பார்வை

மனம் சோர்வுறும் வேளையில் சின்ன அணைப்பு

சண்டை இடும் போதும் காட்டும் அக்கறை

எங்கு சென்றாலும் ஏதேனும் இரண்டு நொடியில் ஒரு தொலைபேசி விசாரிப்பு

இவை அனைத்திற்கும் மேலாக

என்றென்றும் என் மேல் நம்பிக்கை

இது போதும்

வாழ்நாள் முழுமைக்கும்