முடிவு நேரம்

மனமில்லாத சிலருக்கு

வந்து விட்டது

தாய் பாசத்தின்

முடிவு நேரம்...

மூட்டைக்கட்டியாகி விட்டது

பொருட்களோடு

அம்மாவையும்....

இனி தேவை இல்லையாம்

தன் மூன்று வயது

குழந்தையை கவனிக்க

ஒரு ஆள்....

தோன்றாத் துணை

தன் நலத்தை விட

என் நலமே பெரிதாய்

கவலைகள் தன்னை வாட்டும் போதும்

என் மகிழ்ச்சியே முக்கியமாய்..

என் அனைத்து செயல்களிலும்

தோள் கொடுக்கும் துணையாய்..

நானிருக்கிறேன் என்று

எனக்கு  பாதுக்காப்பாய்..

திட்டினாலும்

என் நன்மைக்காய்..

என் அனைத்து கேள்விகளுக்கும் பதிலாய்..

என் பயங்களை ஒழிப்பவராய்..

பின்னிருந்து ஆதரவளிக்கும் சக்தியாய்..

எத்தனை வயதானாலும்

என்னை கைப்பிடித்து நடத்தும் வழிக்காட்டியாய்..

என்றும் என்னோடு இருக்கும்

தோன்றாத் துணை

மறு வார்த்தையில்

அப்பா.....

கோபம்

வார்த்தைகள் தேவையல்ல

பூக்களும் அவசியமல்ல

மன்னிப்பு கோரவும் வேண்டாம்

என் மனம் நாடுவதெல்லாம்

சிறு புன்னகை மட்டுமே

உன் கோபங்களின்

முடிவு

சுகமாய் அமைந்தால் நன்று..

அடுத்த முறையும்

ஆவலுடனே எதிர்ப்பார்ப்பேன்

உன் கோபத்தை !!

சுகமான முடிவின்

நினைவில்…..

காயம்

வலிக்கின்றது

ஒவ்வொரு முறையும்

நீ

என்னை காயப்படுத்துகையில்

சிறு விஷயங்கள்

மிக பெரிதாக

பேசும் வார்த்தைகள்

முள் தைக்க

ஏனோ மறந்து விடுகிறாய்

காயப்படுத்துவது

என்னை மட்டுமல்ல

உன்னையும் இணைத்தே என்பதை...

மெளனமாக காத்திருக்கிறேன்

வலியோடு....

என் மீதான அன்பு

உன் கோபத்தை மறைக்கும்

நிமிடத்தை எதிர்பார்த்து........

எச்சரிக்கை

காணி நிலமும்

தோட்டத்தில் கிணறும்

அருகே தென்னை மரமும்

கேட்ட பாரதி

நல்ல வேளையாக அறியவில்லை

இன்றைய நிலையை

முப்பது மாடி கட்டடங்களும்

வான் உயர நிற்கின்றன

ஆயினும்

நீர் ஏற்றப்படுகிறது

தண்ணீர் வண்டிகளில்

நிலத்தடி நீரின் அளவு

செல்கிறது

ஒவ்வொரு வருடமும்

ஆழமாக

இது

மனிதர்களுக்கு

பூமி தரும் எச்சரிக்கை போல

இன்னும் சில நூற்றாண்டுகளில்

உன் தலைமுறையும்

இந்த ஆழத்திற்கே

செல்லும் என்று....

மழலை

குள்ள வாத்தும்

ஜாக் அன்ட் ஜில்லும்

பாட்டி சுட்ட வடையும்

திருடிய காகமும்

சம்மந்தமே இல்லாத கதைகளும்

இனிக்கின்றன

கண்ணை உருட்டி

அபிநயங்களுடன்

சிறு அசைவுகளுடனான நடனத்தோடு

மழலைகள்

கூறும் போது...

முழுமை

நமக்குள்ளான உறவு

வரமா

விபத்தா

நான் அறியேன்

ஆயினும்

உன்னோடான

என் ஒவ்வொரு நிமிடமும்

சிறு தீண்டலும்

சிறுபிள்ளைத்தனமான விளையாட்டுகளும்

வெடிக்கும் சண்டைகளும்

தொடரும் இனிய சமாதானங்களும்

புரிதலும்

பகிர்தலும்

ஆறுதலும்

இம்சைகளும்

உன் சிறு அணைப்பும்
முழுமை அடைய செய்கிறது
என் வாழ்வை.....

மதம்

எம்மதமும் ஒன்றாம்

ஏற்றுக்கொள்ள மறுக்கின்றனர் பலர்

கூட்டிக் கழித்து பார்த்தால்

அனைத்து மதங்களும்

அனைத்து போதனைகளும்

அனைத்து அவதாரங்களும்

நம் தமிழ் படங்களை போல

ஒரே கதை தான்

சிலுவையில் அறையப்பட்டவரும்

கல்லால் அடிக்கப்பட்டவரும்

சொந்த நாட்டை விட்டு துரத்தப்பட்டவரும்

இறுதியில்

விட்டுச்சென்ற போதனை எல்லாம்

அன்பும் அமைதியும் தான்!!!!

தன் மதமே பெரிதென

மொழிந்து பலர்

வாழ்வின் முக்கியமானதான

மதங்கள் போற்றும்

அன்பை தொலைகின்றனர்....

ஏமாற்றம்

தினமும்

உன்னை எதிர்ப்பார்த்து

ஏமாறுகிறேன்

ஆயினும்

நீ

வருவதெல்லாம்

கனவில் மட்டுமே

பிடித்துக்கொள்ள நினைக்கிறேன்

உன் கரங்களை

கனவில்லாவது

என்னை சுற்றிடும்

அனைத்து செயல்களும்

உன்னையே நிறுத்துகின்றது

என் நினைவின் முன்னே

நீ கொடுத்த

பொம்மைகளும்

நிறைக்கவில்லை

உன் இடத்தை

அத்தனை தூரத்தில் இருந்தும்

என்னை

பாதிக்க முடிகிறது

உன்னால் மட்டும்......

ஏமாற்றாதே

இனியும்....

என் மனம்
தவிக்கின்றது

உன் பிரிவால்.....

சொந்த ஊர்

ஊருக்குள் நுழையும் போதே

பற்றிக்கொள்ளும் 

உற்சாகம்

ரயிலின் ஜன்னல் வழியே தெரியும்

பழக்கமான பாலங்களும்

கோவில்களும்

நினைவுப்படுத்தும் பழைய நினைவுகளை

விடிகாலை விளக்கோடு சாலைகளும்

வறண்டிருப்பினும் அழகோடு தெரியும் ஆறும்

ரயில் தண்டவாளத்தை அடையும் முன்பே

எட்டித்தெரியும் ரயில் நிலையமும்

முழுதடைய செய்கிறது

மனதை

பெரிய நகரங்களில் 

எவ்வளவு  செல்வத்தோடு வாழ்ந்தாலும்

அடைய முடிவதில்லை

சொந்த ஊரின்

ஸ்பரிசம் தரும்

சந்தோஷத்தை....

தனிமை

தனக்கென அலங்கரிக்கப்பட்ட பெரிய அறை

விலையுயர்ந்த ஆடைகள்

அழகான வைர நகைகள்

விதவிதமான

ஆடும் ஓடும்

மொம்மைகள்

அதிநவீன கணினி விளையாட்டுகள்

பெரிய புது வகை தொலைக்காட்சி

அதில் ஓடும் சின்ரெல்லா கதை

அனைத்து வகை சாக்லெட்கள்

நினைத்தவுடன் கிடைக்கும் பொருட்கள்

எதுவும் மகிழ்விக்கவில்லை

அவ்வப்போது எட்டிப்ப்பார்க்கும் பெற்றோருடன்

வேளையாட்களின் பொறுப்பில்

வளரும்

சிறுமிக்கு!!!

கண்ணாடி

எனக்கு தெரியாமல் 

ஒளித்து மறைத்து

ஏதோ திட்டமிடுகிறாய்

என்னை ஆச்சரியமடைய வைக்க

உன் முகம் பார்த்தே

கண்டுபிடித்து விடுகிறேன் 

நீ செய்யும் 
கள்ளத்தனத்தை

நான் என்ன கண்ணாடியா 

குறுகுறுப்போடு கேட்கிறாய்...

ஆம் 

நீ  கண்ணாடி தான்...

எனக்கு மட்டுமேயான 

உன்னையும் என்னையும் இணைத்து

 பிரதிபலிக்கும் 

என் கண்ணாடி.!!!!

நிறங்கள்

கிளியின் மூக்கு நிறத்தில்
சிகப்பு உடை

அதில்

பொடி பொடியாக

எழுமிச்சை பழத்தின் நிறத்தில்

மஞ்சள் நிற புள்ளிகள்

வீட்டின் சுண்ணாம்பு

ஆரஞ்சு பழ நிறத்தில்

மாட்டின் கொம்புகளில்

வானின் நீலமும் கடல் பச்சையும்

என

தன் நண்பனின்

வர்ணனையை

இதழில்

சிறு புன்னகையுடன்

கேட்கிறான்

இரவின் நிறத்தை மட்டுமே

வாழ்வில் அறிந்த

பார்வையற்ற சிறுவன்...

தானே சிருஷ்டித்துக்கொண்ட

நிறங்களை 

கற்பனையில் கண்டு.......

தோல்வி

உன் பார்வைக்கும் 
என் பார்வைக்கும் 
சண்டை 

தோற்கடிக்கிறாய் என்னை 

உன் அன்பினில்..

பிரியமில்லை எனக்கு 

ஒரே நாளில் தோற்று விட 

ஏனெனில் 

என் எண்ணம் எல்லாம் 

எப்பொழுதும்

உன்னிடம் தோற்பதே ...

உணர்கிறேன் 

தோற்பதும் சுகமானதென

உன்னால் !!!!!

ஆகையினால்

தோற்கடித்துக் கொண்டே இரு என்னை

என் வாழ்வின் கடைசி நாள் வரை........